هذه إحدى الخواطر أكتبها لكم بقلمي النّازف، وبلهجة دارجة جزائرية، حتى تكون في متناول الجميع.
كل ذكرى فيها تحمل في طيّاتها ابتسامة وآهة… وترسم لكم مشهدًا عشته، وعاشه غيري من أبناء البلدة.
أحاول من خلال الوصف أن أرسم صورًا من الماضي، ليست مجرّد تعبيرات عفوية أو إنشاء عابر،
بل محاولة لفتح أبواب الذاكرة الجماعية، لاستذكار أوقاتٍ ذهبت مع أصحابها، ولم يبقَ منها إلا الأثر.
نستذكر أعزّةً رحلوا عنا، ومعهم أوقات كانت تملؤها النية والصدق...
عادت إليّ هذه المشاهد وأنا أشرع في كتابة روايتي ليلة الانقلاب التي صدرت سنة 2015،
غير أنني لم أفصل فيها، واكتفيت بذكرها في السياق حتى لا أُثقل على القارئ.
أعنون خاطرتي بـ: "توحشت بلادي"... وهذه المرة أنطلق من "الغدير"، مهبط رأسي،
حيث تعلمت الحروف الأبجدية وكيفية تركيب الجمل…
توحشت بلادي - الجزء الأول
توحشت نسمع خطبة من خطب ربيطن في السياسة قدّام صيدلية بوضياف، وهو يتحدث عن سليم الحص نتاع لبنان والحريري...
توحشت نخرج عقد الميلاد من عند عيسى بن طلة، وإلا رابح خضور، وإلا من عند عمار بلالطة أو بايزيد...
ونسمع لحسن البهلي وهو يقول للسيدة نتاع البلدية، هذيك اللي تجي بالحايك: "أعطني شهادة الحياة...
توحشت نسمع مخفي يحكي بالألمانية في حمّام الشامي،
توحشت نشوف المكّاس نتاع السوق زيغة، وهذاك اللي يبيع في الحصر يعطيه 500 مصور فيها الثعلب،
توحشت نشوف بقري الكولون وهو رايح لراس بن مالك، وشنشن وبرغل يسوقوا فيه،مانيش عارف منين جابوا هذه الأسماء؟
توحشت نشوف الساقية وسط الغدير جاية من غيلاسة وواصلة إلى زقاندو،
ونشوف الكوري مربوطين فيه الزوايل، والمشايخ يطلبوا من القهواجي هات حار...
توحشت نشوف الطاهر القبايلي وهو يمضي في المناجل ويسمر في الدواب...
توحشت نجيب الحليب من عند عبد القادر بلخنش اللي ساكن وحده في الصفية،
توحشت نركب في الميل كيلو مع عمي الطيب بن سالم،
توحشت نشوف الريفيلينو نتاع الدشرة وهو يجونقلي في الطويلة، 'نور الدين بن سالم'، والحارس نور الدين بوسام اللي راح للعاصمة وما وْلاّش،
توحشت نشوف علي السوفي بالموتوبيكان، والحانوت اللي قدامو نتاع تيت، وقدامهم علاوة زواوي يدير في الفوتوكوبي،
توحشت نحضر لدرس عند ل... حناشي بالفرنسية في الكوليج،
توحشت رمان وعنب الزمالة، وكرطوس أولاد حناش، وزعرورة أولاد سيدي منصور،
توحشت نسمع لامنبيونص نتاع القهوة اللي تحت البلدية القديمة عند مول الخانة، المخلوفي... راح لي اسمه...
توحشت نحي الزعتر من الكاف، وفي الطريق ناكلوا التفاف والحرايشة... لما نلحقو الزواك ...ونسمعو صوت الكحايل...
توحشت نشري ربعي تمر من السوق، وعاشرة زيتون ونشري حلاوة الكلخ ...
توحشت نسمع الشيخ مقران الي كان يجي ويقول: ياكيال الزيت...
والشيخ هذاك الي في باب السوق يبيع الكتب...
توحشت نشوف بوسعدية الي كان يجي ويذبح فروج ونسقسيه لمن يذبح؟
توحشت نمشي حفيان على تراب لازرار...ونروح لعنصر الدودة ننحي الصلصال باش نمحي اللوحة.
توحشت نعوم في قلتة، وعمار بلجودي يقفز من هيه...
توحشت نشرب من الشرشارة ونطلع فوق شجرة التوت،وريحة المغن والمرويت تنبعث من الواد.
توحشت نقلي البلوط على الكانون نتاع الفوند، وأمي الله يرحمها تقشر لي في حبة رمان...وصهد الفورنو طالع
توحشت نلم الوقيد ونجيبو باش يخبزو لنا الكسرة على الطاجين،
توحشت نروح مع سيدي للجامع والطلبة يتجاراو يفرحوا به...
توحشت نسرح بالغنم.
توحشت ننحي التالمة،وقرن جدي، والخضرة الي يقولوا لها القرنينة...
توحشت نروح نصيد مع خالي محمد ومن ورانا كلب الصيادة الي اسمه ريكس.
توحشت نسمع صوت القوبع والطوطاو،
توحشت نلم البيض من كاش محضن، ونتوضأ في الواد بصابون الرعيان...
توحشت نجيب الماء فوق دابة، وأنا في الطريق هاز المحقن وندندن...
توحشت نشوف الحصادة، وخبيز منهيه جايب معه شكوة لبن...وهم يغنوا شبان صغار طاحوا في قمح مسبل حطوه غمار صلى الله على محمد...
توحشت نسقي البحيرة من الساقية وصوت الجران داير حالة في الواد تحت ضوء القمر،
توحشت نقش الدالية والكرمات، وندير الكرطوس والعنب في قصعة حطب ...
توحشت نلعب القيبان ونركب صاحبي،
توحشت نلعب بالتربولة... ونتذكر أيام البي في ساحة المدرسة...
توحشت نشري رطل زلابية من عند علي التونسي،
نكري كروسة البي من عند لحسن في ليلة من ليالي رمضان قدّام كوشة الزايدي،
ولما نكمل نشري كرني فاني أبيض من عند بالحاج محمد،
وغدوة نشوف ماتش لالمان في قهوة محمد الشيخ،
توحشت نصايد بالتربولة طماع الرعيان مع رابح والحسين،
توحشت نسبغ الوضوء وعمي الطيب بلوعيلات يعلّم فينا،
توحشت نقرأ سورة الرحمان في اللوحة مع سي البشير، وهو يقول: "يااااااااااااهاو..."
توحشت نسمع توهاب الشيخ المسعود تهامي فوق المصلى نتاع الجامع القديم قدّام السحن...
توحشت نشوف الحاج الصغير با لجيومال وهو يتبع في المعزات فوق كاف الطلبة،
توحشت نصلي المغرب مع سيدي الطاهر ونسمع تسبيحات رمضان على الفنار،
توحشت نروح نخرج الدابة من الفوريان نتاع الحسين بلبوهالي،
توحشت نروح نجيب السد، وعبد الرحمان بن دحمان هاز الفالة على كفتو، وعمي الجودي بالفأس يحرك في راسو ويقول لنا واش يالجي طروا واش ياعريانين الرؤوس؟
توحشت نلعب مع عبد القادر مروش بالثلج،ونقل له: السبت يطيح بالأحد والا بالثلاثاء؟
توحشت نلعب الكو مع أحمد صياح ومحمد الطاهر بن عامر، والمسعود...
توحشت نشري حلاوة الربيع من حانوت عمي الطيب، ونشوف شادي والنسر والذيب، الي مربيهم...
توحشت نشوف فيلم عبلة اللي تمثل فيه سميرة توفيق في دار عمي عمار بالباتري... إلخ.
نشوف صغرون نتاع أولاد عبد الواحد في الساحة اللي قريبة من المسجد في الدشرة، وهو يحضّر تحت رنات القصبة والشوك في فمه يمضغ فيه تحت نجوم السماء..ونسقسيه من وين جاء بتلك الطقوس؟.
توحشت نصلي صلاة العشاء في الجامع وراء سيدي الطاهر بسورة والضحى، ونسمع الألحان الرقيقة لتسابيح رمضان... هذا المخناشي وذاك بلحرش... مانيش عارف منين جابوا هذي الألقاب؟
توحشت نشوف واد غيلاسة وواد السيليني وكل الوديان مجتمعين في حملة كبيرة بالقنطرة القديمة في دخلة الغدير، والناس تتعنكش فوق القنطرة القديمة لعدم تفويت المشهد، ورائحة المطر تنبعث من بعيد.
توحشت ليالي رمضان في الغدير قبل مجيء الشرطة... ونسمع صيحات الغديرية: "ارحل بن حموش!"
توحشت نشوف ونلعب مقابلات بين الأحياء ونتذكر أيامات نورالدين الخميني...لما يهيج...
توحشت نشوف الساقية واصلة للثواري ونسمع زقزقة العصافير في الصفصاف الملآن عن آخره بالزوش...
توحشت نشوف طاكسيات الغدير... هذا فريتشي، وهذا ولد الجعدي، وذاك الدروز، وهذا العمري، وذاك بتيش ومعاه بلقمري، والكونغو منهيه مقابلهم يتشمس، وإبراهيم على كتفو الصاك الأكحل...
توحشت نشوف عيسى ولد رابح بن عبد الله وفوق كتفو خروف مديه للباطوار،والدراجي بن تكالي منهيه يحكي مع الشيخ الذيب...وقدامهم بن مقيو يبحث على حصادة...
توحشت نشوف الوزيعة،
توحشت نقعد فوق الدبدر اللي كان في ستاد الغدير، والطاهر حون يسنتري منهيه...
توحشت نشري تربولة كاري من عند أحمد خضور،
توحشت نعود ولو لأيام للطفولة ونسمع صفير الريح ونلعب الثلج مع نتاجي،
توحشت نضرب دورة للضليعة مع ناجي ونجيبو معنا شوية موتر ، وزيدوم، ونتمتعو بعسل النحلة واكتشاف عش الضرايس وحمر صديرو...
توحشت نشوف فيلم كوبوي ولا ويستارن عند المسعود بن التومي في رقراقة عند أخوالي...
توحشت نشوف ساقية غيلاسة مع الطريق حتى الكابس،
توحشت نشوف الرازي ولد الحاج أحمد وهو يقهقه مع الحاج عمر، ومقابلهم الحواس ينتظر في التعليمات ...
توحشت نشوف زيدان وهو يطيب في الجزوة... وعياش من هيه،
توحشت دردشة مع العقون ولد النوقة...
توحشت نشم ريحة الدواء وأنا نشري في البراسيتامول من عند بوضياف واللي يبيع لي شلاخ المبروك خو موسى بابتسامته العريضة.
توحشت نشوف مقابلة للغدير يلعب فيها ولد غازيط عبد الوهاب، وولد بورنان حسين يبيع في البريوش وقت بيشو وعيسى 105 والقرميط، وعمار النحوي منهيه يتحلف في لاربيتر... ويصفر.
توحشت نشوف علي سيطار وهو في باب البلدية القديمة... بمسدسه،
توحشت نشوف ابراهيمي اللي يخمع من رجلو، والابتسامة لا تفارقه، واللي ما يخليش وقت الجماعة، وبن سي عمر يؤذن.
توحشت رمان الزمالة وزعرورة أولاد سيدي منصور وكرطوس أولاد حناش،
توحشت نجيب طريق ماء على الدابة من العوينات قدّام الزمالة في رمضان، ونلقى محمد الشريف بلبوهالي يحكي لي على بومدين لما كان معه في الحدود.
توحشت نطلع لرقراقة، وفي الطريق يحبس بن خالي الصالح بــ 404 ويمركي قرعة الغاز عند بالكانطولي.
توحشت اللمة اللي كانت قدام قهوة قرينة وإلا شلاخ، وتحتهم حانوت لعرابة.
توحشت ريحة قاروا 2aa من بيروتابا نتاع إبراهيم اللي كان مقابل البلدية تحت الكوليج...
توحشت قرعة غازوز نتاع قيوم من القهوة اللي تحت البلدية، والشمرعي يعيط: "قفلة بلا بلا!"
توحشت حفلة وسط الغدير وفيها عمار السطايفي...
توحشت نلعب تنس الطاولة في دار الشباب، والمدير لطرش رايح جاي، والميلود درارجة مطبّق يديه ويخمم في القرار...
توحشت ندخل للسوق وناكل مطارق شواء عند عيسى الشواي،
ونشري كاس نتاع حمص من عند علاب في المتوسطة الجديدة الي صارت تحمل اسم عبد الكريم العقون،
توحشت نحفف عند الميلود بن البهالي،
توحشت نشري سباط من عند محمد بن الباي،
ونشري سروال من عند ساعد التيرغال،
توحشت نشري رطل لحم من عند كرميش والا عمي الطيب بلمداني والا الشيخ الباي،
توحشت نتحمم في حمام بيت الشامي وعمي علي من هيه في لاكاس،
توحشت نركب في كار الكونغو ونروحو كاش خطرة لحمام أولاد تبان ونشرب من عين القراط،
توحشت نشري كاس كوكاو من عند هذاك اللي يحط قدّام الكوليج،
ونسقسي السعيد القهوي إذا كاين الحليب،
توحشت ندخل كوشة بورنان ونشم ريحة الخبز الحامي،
توحشت نشرب قهوة في قهوة شلاخ،
توحشت نهدر مع الطيب شلاخ ونسقسيه إذا بوضياف راهو يخدم،
توحشت نسقسي أحمد زواوي ولا الهامل إذا جاو الدراهم للبوسطا وإذا التيلفون راهو يمشي...
توحشت نشوف فيلم سينما وعبد الحفيظ سلاحجة في الباب يعس،
توحشت نروح ندير برا عند محمد بن عثمان،
توحشت ندخل للمطعم نتاع الكوليج ونسقسي عمتي خضرة واش راهم دايرين للغداء؟
توحشت نسمع بشارة الخير من عند العيساوي،
توحشت نشوف بوجلد يدور في الغدير،
توحشت نشوف الطاهر حون في الملعب،
توحشت نشوف الحسين بليدة وهو هاز المحفظة نتاعو،
توحشت نخيط غندورة عند الحسين بن مسيعيد،
توحشت نشوف القمر والنجوم نتاع بكري... قبل ما يجينا الكهرباء.
نورالدين خبابه
إرسال تعليق