سحابة تمر على الجزائر!
يا خويا، أنا خوك، إذا حبيت أرواح تفهم
نحكي لك عن الجزائر، اسمعني واقرأ تسلَم!
الرداءة لسان الحال، والجاهل، باحث يعلّم!
الفساد عيني عينك، والمُصلِح قالولو: أحشم!
النصّاب صار خبير، والأمين ردّوه مجرم!
يا خويا، أنا خوك، إذا حبيت أرواح تفهم
الشرطي خويا وخوك، والجندي زوّالي محتّم!
في الصف ديما يقدّموه للمعركة باش يزدم!
الصحفي، إياك، شروه بالكتابة، راه يهمهم!
يا خويا، أنا خوك، إذا حبيت أرواح تفهم
البطالة للفقراء، وأولادهم أسياد، ما قرا ما فهَم!
باعوا دم الشهداء، والله، والواقع هو اللي يكلّم!
جيت نفهّم، فهّموني، في السياسة قالولي: تعلّم!
جنرال باع البلاد، على المشاريع راهو يخمّم!
غريبة في التربية، على أولادنا راها تخدم!
ناس يسواو حطّموهم، تقول نهزّ قرداش ونلطم!
يا خويا، أنا خوك، إذا حبيت أرواح تفهم
شاهد ما شافش حاجة، بالمال يمضي ويبصم!
كل يوم يأخذ سكن، ويحلف بالله ما خذاش ويقسم!
يا حفيظ من هذا القوم اللي يحقروا في المعلّم!
البلاد مدّيها الواد، وهو في الواد يتحمّم!
يا خويا، أنا خوك، إذا حبيت أرواح تفهم
بن بولعيد في الأوراس قتلوه، وبوضياف في عنابة أُعدم!
ولد الشهيد همّشوه، وولد القومي هو اللي يصمّم!
تاريخ البلاد شوّهوه، ومستقبل أجيال حبّوه يتحطّم!
ديغول قالها في الثورة: بعد ثلاثين عام يرجع يحكم!
يا خويا، أنا خوك، إذا حبيت أرواح تفهم.
نورالدين خبابه
21 سبتمبر 2014
إرسال تعليق